चितवन / भरतपुर महानगरपालिका–२२ का वडावासीले अबदेखि निःशुल्क रगत पाउने भएका छन् । भरतपुर महानगर वडा नंं. २२ को कार्यालय र नेपाल रेडक्रस सोसाइटी बिच सम्झौता भएपछि वडावासीले निःशुल्क रगत पाउने सुनिश्चित भएको हो । उक्त कार्यको लागि वडा नं. २२ को कार्यालयले बजेट विनियोजन गरेको हो ।
भरतपुर महानगरपालिका वडा नं. २२ का वडाअध्यक्ष विष्णुराज महतो र सचिव रामकृष्ण पाण्डे, रेडक्रस जिल्ला शाखाका तर्फबाट सभापति हरिप्रसाद पौडेल, मन्त्री राममणी खनाल र प्रादेशिक रक्तसञ्चार केन्द्रका वरिष्ठ अधिकृत रमेशकान्त पौडेलले एक औपचारिक कार्यक्रमकाबीच सम्झौतापत्रमा हस्ताक्षर गरेका हुन् ।
- ADVERTISEMENT -
उक्त सम्झौता अनुसार रक्तसन्चार केन्द्रले भरतपुर–२२ का वडावासीलाई निःशुल्क रगत उपलब्ध गराउने छ भने वडा कार्यालयले त्यसको भुक्तानी मासिक रूपमा उपलब्ध गराउने छ । सम्झौता अनुसार उक्त योजनाको अवधि ३ वर्षको हुने उल्लेख छ भने प्रत्येक वर्ष नवीकरण गर्नुपर्ने हुन्छ । साथै सम्झौता पत्रमा बागमती प्रदेश सरकारको स्वास्थ्य मन्त्रालयबाट प्रती युनिट १,३६० हुने उल्लेख समेत गरिएको छ ।
पालिकास्तरमा जिल्लाका अन्यत्र केही पालिकाले यो अभियानको सुरुवात गरेको भएपनि वडास्तरमा भरतपुर महानगरपालिका र चितवन जिल्लाकै पहिलो वडा भरतपुर–२२ भएकोमा नेपाल रेडक्रस सोसाइटी, जिल्ला शाखा चितवनका कार्यसमिति सदस्य कुमारप्रसाद थपालियाले वडा कार्यालयलाई धन्यवाद व्यक्त गरेका थिए ।
- ADVERTISEMENT -
उक्त कार्यक्रममा वडाका जनप्रतिनिधिहरु सुर्यबहादुर गुरुङ, दिपक पौडेल, जिल्लाका रेडक्रसकर्मी लगाएत अन्य व्यक्तिहरुको उपस्थिति रहेको थियो ।
