चितवन / भरतपुरमा वडादशैं जुत्ताचप्पल व्यापार मेला हुने भएको छ । चितवन उद्योग संघको आयोेजनामा चितवन प्रदर्शनी केन्द्रमा असोज १ देखि २४ गतेसम्म मेला आयोजना हुन लागेको शनिबार पत्रकार सम्मेलन मार्फत जानकारी दिइएको हो ।
सम्मेलनमा स्वदेशी उत्पादनलाई प्रवद्र्धन गर्ने उद्देश्यले पर्व मेला २०८१ अन्तर्गत जुत्ताचप्पल व्यापार मेला आयोजना गरिएको चितवन उद्योग संघका अध्यक्ष सुर्यप्रसाद न्यौपानेले बताए ।
- ADVERTISEMENT -
मेलाले स्वदेशी जुत्ता चप्पलको बारेमा आम उपभोक्तालाई जानकारी गराउन सकिने उनको भनाइ थियो । स्वदेशी उत्पादन उपभोगका लागि आम जनमानसमा प्रचारप्रसार गर्न यो मेलाले सहयोग पु¥याउने उनले बताए ।
उनका अनुसार मेलाले आर्थिक रुपमा चलायमान गराउँदै उद्यमी विच स्वच्छ प्रतिस्पर्धा गर्ने अवसर समेत प्रदान गर्ने विश्वास व्यक्त गरे ।
सह–प्रायोजक संस्था बेस ग्लोबल प्रा.लिका अध्यक्ष होमनाथ उपाध्यायले मेलामा आठ कम्पनीका नौं वटा ब्राण्डका जुत्ता प्रदर्शनीमा राखिने जानकारी दिए । मेलामा ४० वटा स्टल रहने बताइएको छ ।
नेपालमा उत्पादित जुत्ताचप्पल तथा छालाजन्य वस्तुहरु लेडिज, जेन्स, बच्चा सबैलाई समेटिनेगरी आकर्षक छुटमा खरिद गर्न सकिने उनले भने ।
आयोजकले मेलामा करिब ३० हजार जोर जुत्ता, चप्पलको बिक्री हुने हुने र १ करोड ५० लाख बराबरको आर्थिक कारोबार हुने अपेक्षा राखिएको छ ।
प्रत्येक दिन जुत्ता चप्पल खरिद गर्ने ग्राहकलाई कुपनको ब्यवस्था गरिएको छ भने जुत्ताचप्पल खरिदमा १५ देखि ५० प्रतिशतसम्म छुट हुनेछ ।
यस्तै मेलामा सहभागी मध्येबाट लक्की ड्र मार्फत खोलिने कुपनहरुबाट एक जनालाई ५० हजार बराबरको खसी उपहार प्रदान गरिने आयोजकले जनाएको छ ।
