गण्डकी प्रदेश महोत्सवको तीन हप्तापछि गरियो समापन

नवलपुर / प्रतिनिधिसभा सदस्य प्राडा शशाङ्क कोइरालाले आफूले निर्वाचनका बेला गरेको प्रतिबद्धताहरु पूरा गर्ने बताएका छन् । नवलपुरको गैँडाकोटमा सञ्चालित दोस्रो संस्करणको गण्डकी प्रदेश महोत्सवको आइतबार समापन कार्यक्रममा बोल्दै नेता कोइरालाले आफूले यहाँको बारेमा एउटा सपना देखेको र ती सपनाहरु पूरा हुने चरणमा रहेको बताएका हुन् ।

“मैले यहाँ रङ्गशाला बनाउँछु, ट्रमा सेन्टर बनाउँछु भनेको थिएँ काम भएको छैन” उनले भने, “नारायणी नदीमा तटबन्ध गर्छु भनेको थिएँ, काम सुरु भएको छ । तर जुन गतिमा हुनुपर्ने हो त्यो गतिमा काम भएको छैन ।”

नारायणी नदीमा तटबन्धको काम छिटो गर्नु भनेर मन्त्रीलाई भनेको भन्दै नेता कोइरालाले काम गर्छु भनेर मन्त्रीबाट आश्वासन पाएको बताए । “हामीले आश्वासन चाहिँ पाउँछौँ, तर काम हुँदैन । यो दुर्भाग्य हो” उनले भने, “जब अठोट लिएका छौँ भने काम गरेर देखाउनुपर्छ । मैले लिएको अठोट आगामी तीन वर्षभित्र पूरा गरेर देखाउँछु ।” आफूले नवलपुरको यस क्षेत्रबाट चारपटकसम्म निर्वाचन जितेको भन्दै नेता कोइरालाले यहाँका जनतामा धेरै आशा भए पनि आफूले विश्वास पाउन नसकेको बताए । कोइरालाले भने, “यहाँ आशा यति धेरै छ, विश्वास मैले कमाउन सकिनँ ।”

जनतामा विश्वासको खाँचो रहेको भन्दै आफूले काम गर्ने कुरामा विश्वास गरिदिन उनले आग्रह गरे । नारायणगढ बुटवल सडक विस्तारमा भइरहेको ढिलाइप्रति आफूले चीनियाँ राजदुतलाई भेटेर चाँडो निर्माण सम्पन्न गराउन ध्यानाकर्षण गर्नेसमेत नेता कोइरालाको भनाइ छ ।

मतदाताहरु साना साना काम लिएर आफूकहाँ आउने गरेका भन्दै उनले साना काम भन्दा पनि यहाँको रुपान्तरणका लागि आफू लागीपरेको दावी गरे । “तपाईँहरु स्कुल बनाइदिनुप¥यो, भवन बनाइदिनुप¥यो भन्दै आउनुहुन्छ” उनले भने, “म सँग विकासका धेरै खाकाहरु छन्, ठूला खाकाहरु तयार परेको छु, त्यस्तो गर्नका लागि दृढ विश्वास छ ।” सरकारलाई आफूले पटकपटक यस क्षेत्रमा विकासको काम हुनुपर्ने भनेर निरन्तर ताकेता गर्दै आइरहेको उनले बताए । जिल्लामा हरेक वर्ष मेला र महोत्सवका गतिविधिहरु हुनुपर्ने भन्दै यस्ता कार्यक्रमले स्थानीय उत्पादनको प्रवद्र्धनसँगै आर्थिक क्षेत्रको चलायनमान हुने उनले बताए । “यो मेला महोत्सवलाई हरेक वर्ष गर्नुपर्छ, यसले नवलपुरको परिचयमात्रै होइन मन्द गतिमा भएको आर्थिकलाई पनि परिचालन गर्छ” उनले भने, “मेला महोत्सवमा मान्छे आउँछन् खर्च गर्छन्, खर्च गर्नु पनि आर्थिक परिचालन गर्नु हो ।”

महोत्सव तथा प्रदर्शनी गर्नका लागि नदीकिनारको भर नपरी अन्यत्र गर्नुपर्नेभन्दै त्यसका लागि आफूले ठाउँ हेरिरहेको उनले बताए । नेपाल उद्योग वाणिज्य महासङ्घ गण्डकी प्रदेशको आयोजनामा कात्तिक १६ देखि सुरु भएको महोत्सव आज समापन गरिएको हो । महोत्सवले गण्डकी प्रदेशको पर्यटकीय सम्भावनाहरुको उजागर गर्न र आर्थिक क्षेत्रलाई चलायमान बनाउन मद्दत गरेको महोत्सव मूल समिति संयोजक अमृत भट्टचनले बताए । तीन सय बढी स्टलहरुको राखिएको महोत्सवमा कृषिका स्टलहरु निःशुल्करुपमा राख्ने व्यवस्था गरिएको थियो ।