काठमाडौँ / नेपाल प्रिमियर लिग (एनपिएल) मा चितवन राइनोजले विजयी सुरुवात गरेको छ ।
कीर्तिपुरस्थित त्रिभुवन अन्तर्राष्ट्रिय क्रिकेट मैदानमा आज (मंगलबार) भएको खेलमा विराटनगर किङ्ग्सलाई ८ रनले हराउँदै चितवनले प्रतियोगितामा विजयी सुरुवात गरेको हो ।
चितवनले दिएको १५८ रनको लक्ष्य पछ्याएको विराटनगरले १९.३ ओभरमा सबै विकेट गुमाउँदै १४९ रन मात्रै बनाउन सक्यो ।
विराटनगरका लागि ओपनर इम्रान शेखले सर्वाधिक ३९ रन बनाए । अलराउन्डर आन्द्रे रसेलले ३३ रन बनाउँदा अर्का ओपनर लोकेश बमले २६ रनको योगदान दिए ।
- ADVERTISEMENT -
यस्तै, एन्जेलो म्याथ्युजले १४, बसिर अहमदले १३ र शुभम रञ्जनेले १० रन बनाए । नरेन साउँदले २ रन थपे । अन्य तीन ब्याटरले खाता खोल्न सकेनन् ।
चितवनका लागि कमलसिंह ऐरीले सर्वाधिक ४ विकेट लिए । रिजन ढकालले २ विकेट लिँदा रन्जित कुमार, मौसम ढकाल, टम लन्सेलोट टेलर र ड्यान माउस्लीले समान १–१ विकेट लिए ।
त्यसअघि टस हारेर पहिले ब्याटिङ गरेको चितवनले निर्धारित २० ओभरमा ३ विकेट गुमाउँदै १५७ रन बनाएको थियो ।
चितवनका लागि डेभिड मलानले सर्वाधिक ७० रन बनाए । रवि बोपाराले अविजित ३१ र ड्यान माउस्लीले अविजित २९ रनको योगदान दिए । देव खनालले १२ र अर्जुन साउदले ३ रन बनाए ।
विराटनगरका लागि आन्द्रे रसेल, एन्जेलो म्याथ्युज र चरिथ असलंकाले समान १–१ विकेट लिए ।
यससँगै चितवनले एनपिएलमा पहिलो खेलमै जित निकाल्दै प्रतियोगितामा सुखद सुरुवात गरेको छ ।
