मन्त्रीहरूको शपथ आज, बिदाइका बेला रोइन् झाँक्री

काठमाण्डौ / प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले मन्त्रिपरिषद् पुनर्गठन गर्नुभएको छ । उहाँले आइतवार पाँच जना मन्त्री फेरबदल गर्नुभएको हो ।
एकीकृत समाजवादी पार्टीको सिफारिसमा प्रधानमन्त्रीले त्यही पार्टीका नयाँ मन्त्रीको नाम पठाउनुभएको थियो । राष्ट्रपतिले संस्कृति, पर्यटन तथा नागरिक उड्डयन मन्त्रीमा जीवनराम श्रेष्ठ, सहरी विकास मन्त्रीमा मेटमणि चौधरी, स्वास्थ्य तथा जनसंख्या मन्त्रीमा भवानीप्रसाद खापुङ, श्रम रोजगार तथा सामाजिक सुरक्षा मन्त्रीमा शेरबहादुर कुँवर र स्वास्थ्य तथा जनसंख्या राज्यमन्त्रीमा हिराचन्द्र केसी नियुक्त हुनुभएको छ । खापुङ यसअघि स्वास्थ्य राज्यमन्त्री हुनुहुन्थ्यो, उहाँलाई मन्त्रीमा बढुवा गरिएको छ ।
मन्त्रीहरूको शपथ ग्रहण आज सोमवार हुने राष्ट्रपति कार्यालयले जनाएको छ ।
बिदाइका बेला रोइन् झाँक्री
शहरी विकासमन्त्री रामकुमारी झाँक्रीले मन्त्री पदबाट राजीना दिई बिदाइका बेला रोएकी थिइन् । मन्त्रालयमा पत्रकार सम्मेलन हुँदै गर्दा उनी रोएकी हुन् । ८ महिना २० दिनपछि उनी मन्त्रीबाट पदमुक्त भएकी हुन् ।
सोही अवसरमा झाँक्रीले आफ्नो कार्यकालमा भएका प्रगति विवरण पनि सार्वजनिक गरेकी थिइन् भने प्रगति विवरण सार्वजनिक हुँदै गर्दा उनी रोएकी थिइन् ।