पुनः नारायणी नदीको बहाब बढ्यो, सतर्कता अपनाउन प्रशासनको आग्रह

चितवन, साउन । आज (शनिबार) विहानैदेखि नारायणी नदीमा पानीको बहाब बढ्दै गएको छ । नारायणी नदीको सतहले आज सतर्कता तह पार गरेको छ ।
जल तथा मौसम विज्ञान विभागले दिएको जानकारी अनुसार देवघाट र नारायणगढ क्षेत्रमा पानीको बहाब बढेको छ । यी क्षेत्रमा नदीको सतह बढेर खतराको तहतर्फ उन्मुख भएको छ । अहिले देवघाट क्षेत्रमा पानीको सतह ७.५ मिटर पुगेको छ । यस क्षेत्रमा नदीको सतह ७.३ मिटर नाघेमा सतर्कता तह पार गरेको मानिन्छ । ८ मिटरलाई खतराको तह मानिन्छ ।
यस्तै नारायणगढ क्षेत्रमा पानीको सतह ११.४ मिटर पुगेको छ । यस क्षेत्रमा ११ मिटर सतहलाई सतर्कता तह मानिएको छ । नारायणीमा पानीको बहाब अहिले निरन्तर बढीरहेको छ । चितवनमा वर्षा नभएपनि देशका पहाडी क्षेत्रहरुमा भएको वर्षाका कारण नारायणी नदीको सतह बढ्दै गएको हो । चितवनका प्रमुख जिल्ला अधिकारी नारायणप्रसाद भट्टराईले नारायणी नदीको तह खतरातर्फ उन्मुख भएकाले नदी तटिय क्षेत्रका बासिन्दालाई सतर्कता अपनाउन आग्रह गरेका छन् । उनले नदी आसपासमा नजान आग्रह गर्दै सचेतना अपनाउन भनेका छन् ।
नारायणी नदीमा पानीको बहाब बढ्दा चितवनको पश्चिम क्षेत्र बढी डुबानमा पर्ने गरेको छ ।