छुट्टाछुट्टै दुर्घटनामा तीन जनाको मृत्यु

रौतहट / रौतहटमा सवारी दुर्घटना हुँदा दुई जनाको मृत्यु भएको छ । गौर चन्द्रपुर सडकखण्ड अन्तर्गत माधवनारायण नगरपालिका–३ सखुअवामा शनिबार साँझ ना १ ज ६७४९ नम्वरको म्याजिक जिप र बा ३९ प ८८६५ को नम्वरको मोटरसाइकल एकापसमा ठोक्किएर दुर्घटना हुँदा दुई जनाको मृत्यु भएको रौतहट प्रहरीले जनाएको छ ।
प्रहरीका अनुसार मृत्यु हुनेहरुमा माधवनारायण–२ का ६५ वर्षका परमात्मा प्रसाद साह र सोही पालिकाका वडा नं. २ का ६५ वर्षका गौकरण यादव रहेका छन् । मोटरसाइकलमा सवार दुर्घटनामा गम्भीर घाइते भएका उनीहरुको सुकदेवचोकस्थित अस्पतालमा उपचारका क्रममा मृत्यु भएको प्रहरीले जनाएको छ ।
जिपका चालक चन्द्रपुर नगरपालिका–४ का २७ वर्षका महम्मद सहुल मियाँलाई प्रहरीले नियन्त्रणमा लिई घटनाको बारेमा आवश्यक अनुसन्धान गरिरहेको जनाइएको छ ।
यस्तै तनहुँको बदीपुरमा बसको ठक्करबाट स्कुटर चालकको मृत्यु भएको छ । पृथ्वीराजमार्ग सडकखण्डमा पोखराबाट काठमाडौंतर्फ जाँदै गरेको प्रदेश नम्वर ३–०१–००६ ख ०९२४ नम्वरको बसले शनिबार अपरान्ह विपरित दिशाबाट आउँदै गरेको ग १३ प ३५५४ नम्वरको स्कुटरलाई ठक्कर दिँदा एक जनाको मृत्यु भएको हो ।
बसको ठक्करबाट स्कुटर चालक शेख महमद रखिम मियाको मृत्यु भएको प्रहरीले जनाएको छ । दुर्घटनामा परेर गम्भीर घाइते भएका उनलाई तत्कालै दमौली अस्पताल पुर्याइएको थियो । मियाको उपचारका क्रममा मृत्यु भएको प्रहरीले जनाएको छ ।
मिया तनहुँको भानु नगरपालिका १३ समजपुर बस्थे । बस चालक सिन्धुली गोलञ्जोर गाउँपालिका ४ का ३३ वर्षीय चुक्तबहादुर ठकुरीलाई प्रहरीेले नियन्त्रणमा लिई घटनाको बारेमा आवश्यक अनुसन्धान गरिरहेको जनाएको छ ।