भरतपुर / चितवनमा लागुऔषधसहित चार जना पक्राउ परेका छन् । चितवन प्रहरीले भरतपुर महानगरपालिका–११ मनकामना टोलबाट लागुऔषधसहित उनीहरूलाई पक्राउ गरेको हो ।
जिल्ला प्रहरी कार्यालय चितवनका अनुसार गत कात्तिक ३० गते लागुऔषध कारोबार भइरहेको सूचनाका आधारमा अस्थायी प्रहरी पोस्ट भोजाडबाट खटिएको प्रहरी टोलीले उनीहरूलाई पक्राउ गरेको हो ।
प्रहरीले पक्राउ परेकाहरूको साथबाट ट्रामाडोल २ हजार ४९० पिस, एनारान २ हजार ५०० पिस र नगद ४९ हजार ७९० रुपैयाँ बरामद गरेको जनाएको छ ।
पक्राउ पर्नेमा भरतपुर महानगरपालिका–२५ का ३० वर्षीय निरज क्षेत्री, वडा नम्बर ११ का ३४ वर्षीय विजय कुमाल, वडा नम्बर २५ का २५ वर्षीय अजित विक र वडा नम्बर ११ का ३२ वर्षीय बसन्त लामा रहेका छन् ।
- ADVERTISEMENT -

पक्राउ परेका चारै जनामाथि लागुऔषध (नियन्त्रण) ऐन, २०३३ बमोजिम थप अनुसन्धान भइरहेको जिल्ला प्रहरी कार्यालय चितवनले जनाएको छ ।
















































