चितवन / नेपाल मानव अधिकार संगठन शाखा चितवनले भरतपुर महानगरपालिका क्षेत्रभित्र सञ्चालित बालगृह तथा अनाथालयको अनुगमन गर्ने निर्णय गरेको छ ।
शाखा अध्यक्ष हरिप्रसाद अधिकारीको अध्यक्षतामा बसेको बैठकले गत वर्षका गतिविधिको समीक्षा गर्दै आगामी कार्ययोजनाअन्तर्गत बालगृह तथा अनाथालयको अवलोकन र अनुगमन गर्ने निर्णय गरेको हो ।
बैठकमा २०८२ सालमा संगठनले सम्पन्न गरेका प्रमुख गतिविधिको समीक्षा गरिएको थियो । गत फागुनमा सम्पन्न आम निर्वाचनमा निर्वाचन पर्यवेक्षण, वैशाखमा मानव अधिकारको अवस्था र मानव अधिकारकर्मीको दायित्व विषयमा छलफल तथा कार्यपत्र प्रस्तुति र साउनमा कारागारलगायत विभिन्न संस्थाको अनुगमनमा सहभागिता जनाएको विषयमा समीक्षा गरिएको थियो ।
त्यसैगरी जिल्लामा हुने मानव अधिकार उल्लंघनका घटनाको नियमित अनुगमन तथा संगठनका गतिविधिबारे पनि छलफल भएको थियो ।
- ADVERTISEMENT -

बैठकले आगामी दिनमा भरतपुर महानगरपालिका क्षेत्रभित्र रहेका बालगृह तथा अनाथालयको अवस्था बुझ्न अनुगमन गर्ने र त्यसबाट प्राप्त तथ्य तथा अवस्थाबारे प्रतिवेदन तयार गरी जानकारी गराउने निर्णय गरेको संगठनले जनाएको छ ।
संगठनका गतिविधि तथा कार्यक्रम सफल बनाउन सहयोग गर्ने व्यक्ति, संघसंस्था र सरोकारवालाप्रति बैठकले आभारसमेत व्यक्त गरेको छ ।


















































