ज.ज.क. मुद्दाका फरार दुई अभियुक्त ६ वर्षपछि पक्राउ

कञ्चनपुर / कञ्चनपुरमा सामूहिक करणी मुद्दाका फरार दुई अभियुक्तलाई प्रहरीले ६ वर्षपछि पक्राउ गरेको छ ।
जिल्ला प्रहरी कार्यालय कञ्चनपुर र इलाका प्रहरी कार्यालय त्रिभुवन बस्तीबाट खटिएको प्रहरी टोलीले पुनर्वास नगरपालिका–११ का ३० वर्षीय चन्नु राना र सोही ठाउँका २६ वर्षीय अनिल रानालाई सोमबार पक्राउ गरेको जिल्ला प्रहरी कार्यालय कञ्चनपुरका प्रहरी नायब निरीक्षक अमरबहादुर थापा क्षेत्रीले जानकारी दिए ।
स्थानीय युवतीलाई करणीको वारदातपछि दुवै जना २०७१ फागुन महिनादेखि फरार रहेका थिए । कञ्चनपुर जिल्ला अदालतले दुवै जनालाई २०७२ असार २८ गते जनही ११-११ वर्षको कैद सजाय तोकेको थियो । घरमै रहेका बेला दुवै जना पक्राउ परेका हुन् । पक्राउ परेका दुवै जनालाई आवश्यक कारवाहीका लागि प्रहरीले अदालतमा पेश गरेको छ ।