साढे चार तोला सुन लिएर स्वर्णकार दम्पत्ती बेपत्ता, सुनधनी बिचल्लीमा

विराटनगर । चन्दा ज्वेलर्सका सञ्चालक चन्दन स्वर्णकार र संगीता स्वर्णकारले ४ लाख ५० हजार मुल्य बराबरको सुन लिएर बेपता भएका छन् । मोरङ बुढीगंगा २ टंकीसिनुवारीकी देवी थापा निरौलाले उक्त साढे चार तोला सुन धितो राखेर चन्दा ज्वेलर्सबाट १ लाख रुपैयाँ कर्जा लिएकी थिइन् ।
उनीमात्र होइन बुढीगंगा ३ बासवारीकी राधा बरालको समस्या पनि उस्तै छ । राधाले पनि ‘चन्दा ज्वेलर्स’मा १४ हजार रुपैयाँमा आधा तोला सुन धितो राखेकी थिइन् । गत एक हप्तादेखि उक्त सुन पसल बन्द भएपछि देवी र राधा बिचल्लीमा परेका छन् । पीडितहरुका अनुसार फरार स्वर्णकार दम्पत्तीले बुढीगंगाका सयौँको संख्यामा धितो राखेको लाखौंको सुनचाँदी लिएर फरार भएको हो ।
स्थानीय सूर्यबहादुर थापाका अनुसार उनीहरुले करिब एक सय जनाको धितोमा राखेको सुन र पैसा दिएर बनाउन दिएको सुन लिएर संचालक फरार रहेको बताउनुभयो ।
थापाका अनुसार सुन धनीहरुबाट चन्दा ज्वेलर्सले सुन धितोमा राखेर २४ प्रतिशत ब्याज लिने गरेको पाइएको छ । संचालक दम्पती भागेको हल्ला चलेपछि धितो राख्ने र पैसा दिएर सुनचाँदी बनाउन दिने सर्वसाधारणको अहिले दैनिक पसलमा भीड हुने गरेको छ ।
मोरङ प्रहरी कार्यालयका प्रवक्ता डिएसपी मानबहादुर राईले धितोमा राखेर सुन लिएर फरार भएको किटानी जाहेरी परेपछि अनुसन्धान सुरू गरेको जानकारी दिनुभयो । उनले प्रहरीमा अहिलेसम्म ३० जना भन्दा बढीको निवेदन आएको बताउनुभयो । फरार दम्पत्तीको खोजी कार्य सुरु भएको उहाँले बताउनुभयो ।