मानसिक तनाव कम गर्न नारायणगढको पुलचोकमा संगित थेरापी

चितवन / विश्वभर महामारीको रुपमा फैलिएको कोभिड १९ का कारण जनमानसमा देखिएको मानसिक तनाव कम गर्न नारायणगढको पुलचोकमा संगीत थेरापी कार्यक्रम संचालन गरिएको छ । विभिन्न समस्याको कारण तनावमा रहेका आमनागरिकलाई तनाव मुक्त गर्ने उद्देश्यले बागमती प्रदेश प्रहरी कार्यालय हेटौंडाको सहयोग र जिल्ला प्रहरी कार्यालय चितवनको आयोजनामा शुक्रबार नारायणगढमा उक्त कार्यक्रम गरिएको हो ।
संगीत थेरापीमा उल्लेख्य मात्रामा सर्वसाधारणले उपस्थिती जनाई थेरापीबाट लाभ दिएको र उनीहरुमा सकारात्मक प्रभाव परेको चितवनका प्रहरी प्रवक्ता डिएसपी सुर्य थापाले बताए । बागमती प्रदेश प्रहरी ब्याण्ड गुल्मद्वारा गरिएको कार्यक्रममा स्वास्थ सुरक्षाप्रति पूर्ण सावधानी अपनाइएको र विभिन्न किसिमका धुनमार्फत तनाव व्यवस्थापनको प्रयास गरेको उनले भने ।
उनले कोभिडको कारणबाट रोजगार गुमेका, आर्थिक समस्या आदिले मानिसहरुमा तनाव सृजना भएको अवस्थामा संगीतको माध्यमबाट केही हदसम्म भए पनि तनाव कम गर्न सकिने भएकाले म्युजिकल थेरापी आयोजना गरेको बताए ।
उनका अनुसार बागमती प्रदेशकै मकवानपुर, काठमाडौंलगायतका अन्य जिल्लामा पनि यस्ता कार्यक्रम आयोजना भइसकेको छ ।