सिओल / दक्षिण कोरियामा हालसम्मकै ठूलो डढेलोबाट मृत्यु हुनेको संख्या २६ पुगेको छ । डढेलोमा परी ३० जना घाइते भएका छन् भने ८ जनाको अवस्था गम्भीर रहेको बताइएको छ ।
अधिकारीहरूले मृत्यु हुने अधिकांशको उमेर ६० देखि ७० वर्षको बिचमा रहेको जानकारी दिएका छन् । बुधबार डढेलो नियन्त्रणका लागि परिचालन गरेको हेलिकप्टर दुर्घटना हुँदा एक जना पाइलटको निधन भएको थियो । कम्तीमा ३ जना अग्नि नियन्त्रकहरूले पनि ज्यान गुमाइसकेका छन् ।
- ADVERTISEMENT -
डढेलो नियन्त्रण गर्नका लागि हजारौँ अग्नि नियन्त्रकहरूका साथै सैनिक परिचालन गरिएको छ । डढेलो सांस्कृतिक सम्पदाहरूमाथि ठुलो खतरा बनेको छ । उइसोङ सहरमा आगलागीका कारण सन् ६१८ मा बनेको गौन्सा मन्दिर ध्वस्त बनेको छ । यो सो प्रान्तको सबैभन्दा ठूलो मन्दिरमध्ये एक थियो ।
यो डढेलो गत शुक्रबार सान्चेओङ काउन्टीबाट सुरु भएको थियो । हालसम्म यो थप ६ वटा काउन्टीमा फैलिसकेको छ । तीव्र र सुक्खा हावाको कारण यो अझ फैलिरहेको छ ।
दक्षिण कोरियाको विपद् व्यवस्थापनका प्रमुख ली हान क्युङका अनुसार डढेलो ३५ हजार ८१० हेक्टरमा फैलिसकेको छ । दक्षिण कोरियाको इतिहासमा यो सबैभन्दा ठुलो डढेलो भएको बताइएको । यसअघि सन् २००० मा लागेको डढेलोले २३ हजार ९१३ हेक्टर क्षेत्रमा क्षति पुर्याएको थियो । -एजेन्सी ।
