काठमाडौं / नेपाली महिला राष्ट्रिय फुटबल टोलीको एएफसी एसियन कप खेल्ने सपना फेरि एकपटक अधुरै बनेको छ । शनिबार उज्वेकिस्तानमा भएको छनोट चरणको निर्णायक तथा अन्तिम खेलमा नेपालले घरेलु टोलीविरुद्ध अविश्वसनीय पुनरागमन गरे पनि पेनाल्टी सुटआउटमा पराजित हुँदै प्रतियोगिताबाट बाहिरिएको हो ।
दुई गोलले पछि परेको स्थिति उल्टाउँदै निर्धारित ९० मिनेटको खेल ३(३ को रोमाञ्चक बराबरीमा टुंग्याएपछि खेलको निर्णय पेनाल्टी सुटआउटबाट लिइएको थियो । तर, पेनाल्टीमा नेपाल दुर्भाग्यशाली सावित भयो र ४(२ ले पराजय भोग्न बाध्य भयो ।
- ADVERTISEMENT -
तास्केन्तस्थित घरेलु मैदानमा उज्वेकिस्तानले खेलको सुरुवातमै नेपालमाथि दबाब बनायो । दोस्रो मिनेटमै खाबिबुलेएभाले गोल गर्दै आयोजकलाई अग्रता दिलाइन् । पहिलो गोलको झट्काबाट सम्हालिन नपाउँदै १२ औं मिनेटमा नेपालले अर्को दुर्भाग्यपूर्ण गोल बेहोर्यो । नेपाली डिफेन्डर समिक्षा घिमिरेको खुट्टामा ठोक्किएर बलले जाली चुमेपछि उज्वेकिस्तानले २(० को अग्रता बनायो ।
संकटमा परेको नेपालका लागि २४ औं मिनेटमा कप्तान सावित्रा भण्डारी ‘साम्बा’ले सान्त्वना गोल फर्काइन् । विपक्षी गोलकिपरको गल्तीको फाइदा उठाउँदै रश्मि कुमारी घिसिङको हेडर पासमा साम्बाले करिब २५ यार्ड टाढाबाट प्रहार गरेको सुन्दर सटले सिधै गोलपोस्टको जाली चुम्यो । तर, खेलको ३७ औं मिनेटमा सरस्वती हमालको ह्यान्डबलपछि पाएको पेनाल्टीलाई उज्वेकिस्तानकी मातफुना सोयीमोभाले गोलमा परिणत गर्दा पहिलो हाफमा नेपाल ३(१ ले पछि पर्यो ।
- ADVERTISEMENT -
पहिलो हाफको इन्ज्युरी समयमा साम्बामाथि फल गरेपछि उज्वेकिस्तानकी खेलाडीले दोहोरो पहेँलो कार्ड पाउँदै मैदान छाडिन् । यसले खेलमा नयाँ मोड ल्यायो र १० खेलाडीमा समेटिएको उज्वेकिस्तानविरुद्ध दोस्रो हाफमा नेपालले आक्रामक खेल प्रस्तुत गर्यो ।
दोस्रो हाफमा नेपाली चेलीहरूले अविश्वसनीय खेल प्रदर्शन गरे । लगातारको आक्रमणको फल नेपालले ७१ औं मिनेटमा पायो र खेललाई ३(२ को स्थितिमा ल्यायो । त्यसको एक मिनेट नबित्दै ७२ औं मिनेटमा कप्तान साम्बाले व्यक्तिगत दोस्रो गोल गर्दै नेपाललाई ३(३ को रोमाञ्चक बराबरीमा फर्काइन् ।
निर्धारित समय बराबरीमा सकिएपछि खेल पेनाल्टी सुटआउटमा धकेलियो । तर, यहाँ नेपालको भाग्यले साथ दिएन । नेपालकी ‘गोल मेसिन’ कप्तान सावित्रा भण्डारीको पहिलो प्रहार नै पोस्टमा लागेर बाहिरिनु नेपालका लागि ठूलो झट्का बन्यो । चौथो प्रहारमा गोलकिपर अन्जना राना मगरको सटलाई उज्वेकिस्तानी किपरले बचाइन् । नेपालका लागि गीता राना र सविता राना मगरले मात्र गोल गर्न सके ।
छनोटबाट समूह विजेता टोली मात्र अर्को वर्ष मार्चमा अष्ट्रेलियामा हुने एसियन कपमा पुग्ने थियो । महिला एसियन कप र विश्वकप र ओलम्पिकको पनि छनोटको आधार भएकोले एसियन कपमै छनोट नहुँदा नेपालले एकै पटक तीन मुख्य प्रतियोगिताको अवसर गुमाएको हो ।
