दिनानुदिन संक्रमित बढेपछि भोलिदेखि भरतपुरमा निषेधाज्ञा

भरतपुर । भरतपुर महानगरपालिकाभित्र आज राति (शुक्रबार) १२ बजेबाट निषेधाज्ञा जारी गरिएको छ । भरतपुर आसपासमा कोरोना भाइरस (कोभिड–१९) संक्रमण बढ्दै गएपछि उक्त निर्णय गरेको हो ।
चितवनका प्रमुख जिल्ला अधिकारी नारायणप्रसाद भट्टराई, जिल्ला प्रहरी कार्यालय चितवनका प्रमुख नान्तीराज गुरुङ, उद्योगी व्यवसायीहरुसँग भएको छलफलले एक साता निषेधाज्ञा जारी गर्ने निर्णय भएको हो ।
चितवनमा सबैभन्दा बढी भरतपुर महानगरपालिकामा कोरोना संक्रमित भेटिएका छन् । भरतपुर महानगरभित्र कोरोना भाइरस समुदायस्तरमै फैलिएको स्वास्थ्य विज्ञहरुले बताएका छन् ।
निषेधाज्ञा जारीपछि महानगर क्षेत्रभित्र सार्वजनिक यातायात पूर्णरूपमा ठप्प हुने, उद्योग तथा कलकारखानाहरू सञ्चालनमा समेत कडाई गरिनेछ । निषेधाज्ञा अवधिभर अत्यावश्यक सेवा मात्रै सञ्चालन गर्न पाइने छ ।
स्वास्थ्य सुरक्षाको उच्चतम उपाय अपनाएर मात्रै सञ्चालन गर्न पाइने चितवनका प्रजिअ भट्टराईले जानकारी दिनुभयो । निषेधाज्ञा उल्लंघन गरेको पाइएमा कडा कारवाही गरिने उहाँले बताउनुभयो ।