नारायणघाट । तामाङ भाषाको चलचित्र ‘ए ङाला ह्राङबा माया’ चितवनमा प्रदर्शन गरिएको छ । बुधबार इन्द्रदेव सिनेमा घरमा प्रदर्शन गरिएको हो । चितवन गुम्बा महासमितिको आयोजनामा भएको विशेष प्रदर्शनमा इन्द्रदेव हल दर्शकले भरिभराउ भएको थियो । करिब तीन घण्टा लामो चलचित्र राम्रो बनेको दर्शकहरुले प्रतिकृया दिएका थिए ।
चलचित्र प्रदर्शनको लागि चलचित्रका निर्माता, निर्देशक तथा कलाकारहरु चितवन आएका थिए । उनीहरुले दर्शकसँगै बसेर चलचित्र हेरेर प्रतिकृयासमेत बटुलेका छन् । चलत्रित्रमा हुत्त सञ्जय लामा, तारा थोकर, विक्रम लामा, प्रज्मी बोम्जन, हेमकुमार तितुङ, हीराबहादुर मोक्तान, गोकुल मोक्तान, अनिल ब्लोन, राजकुमार स्याङतान, सङ्गीता बोम्जन, राम तामाङ, राजकुमार बललगायतका कलाकारहरुको अभिनय हेर्न पाइन्छ ।
- ADVERTISEMENT -
चलचित्रका मुख्य नायकसमेत रहेका हुत्त सञ्जय लामाले आफैँ कथा तथा सम्वाद लेखेका छन् भने अभिनयसँगै निर्देशन पनि गरेका छन् । मुख्य सहायक निर्देशन भने विश्वजङ माझीले गरेका छन् ।
मनसुन सुपरस्टार मुभिज प्रालिको ब्यानरमा तयार भएको चलचित्रको निर्देशनमा हुत्त सञ्जयलाई अर्जुनले साथ दिएका छन् । प्रज्वल राउतले छायांकन गरेको चलचित्रमा अर्पित थिङको संगीत सुन्न सकिन्छ । विश्वजङ्ग माझीको नृत्य निर्देशन रहेको चलचित्रलाई एचएमएम मिडिया हाउसमार्फत मेकबहादुर थापाले सम्पादन गरेका हुन् ।
- ADVERTISEMENT -
लोसाङ लामा र इकेश लामाङले निर्माण गरेको चलचित्रमा सागर दोङ तामाङ र हुत्त सञ्जय लामाको गीतलाई स्प्रिङ थिङको आवाजमा सुन्न सकिन्छ । चलचित्र हेर्न चितवन जिल्लाका विभिन्न स्थानबाट हल भरी दर्शक आएका थिए । इन्द्रदेव सिनेमा करिब ८५० जना अटाउने नेपालकै सबैभन्दा ठूलो चलचित्र हलमा पर्छ ।
चलचित्र प्रदर्शन अघि औपचारिक कार्यक्रम समेत गरिएको थियो । नेपाल आदिवासी जनजाती पत्रकार महासंघ बागमती प्रदेशका निवर्तमान उपाध्यक्ष राजेश रुम्बाको प्रम्ख आतिथ्यता रहेको थियो भने चितवन गुम्बा महासमितिका अध्यक्ष मेकना तामाङको सभाध्यक्षमा सम्पन्न गरिएको हो ।
कार्यक्रममा सहयोगी दाताहरुलाई मायाको चिनो र प्रशंसा पत्र समेत प्रदान गरिएको थियो भने अध्यक्ष तामाङले सबैलाई धन्यवाद व्यक्त गरेका थिए । लामो समयको अन्तरालपछि चितवनमा तामाङ चलचित्र प्रदर्शन भएको हो भने यसअघि तामाङ पत्रकार संघ चितवन शाखाले तामाङ चलचित्र ‘पहिचान’ नामक चलचित्र प्रदर्शनमा ल्याएको थियो ।
