काठमाडौँ / नेपाली कांग्रेसको १५औँ महाधिवेशनबाट गगनकुमार थापा पार्टी सभापतिमा निर्वाचित भएका छन्। शुक्रवार सम्पन्न मतदानको मतगणनामा प्रतिस्पर्धी श्यामकृष्ण खड्गीलाई फराकिलो मतान्तरले पराजित गर्दै थापा सभापतिमा निर्वाचित भएका हुन् ।
महाधिवेशनको मिडिया सेन्टरका सदस्य महेश गौतमका अनुसार थापाले ६ हजार ५८४ मत प्राप्त गर्दा उनका प्रतिस्पर्धी खड्गीले ३७५ मत प्राप्त गरेका छन् । थापा ६ हजार २०९ मतान्तरले विजयी भएका हुन्।
- ADVERTISEMENT -
शुक्रवार मतदान सम्पन्न भएलगत्तै काठमाडौँस्थित राष्ट्रिय सभागृहमा राति अबेरदेखि सुरु भएको मतगणना शनिवार बिहान सम्पन्न भएको हो।
निर्वाचन समितिका अनुसार महाधिवेशनमा कुल ७ हजार ३१७ प्रतिनिधिमध्ये ७ हजार ३९ जनाले मतदान गरेका थिए भने, ५४ मत बदर भएका छन्।
सभापतिमा थापाको विजयसँगै नेपाली कांग्रेसले नयाँ नेतृत्व पाएको छ। अब उनको नेतृत्वमा पार्टीको संगठनात्मक सुदृढीकरण, आन्तरिक एकता र आगामी राजनीतिक कार्यदिशा कसरी अघि बढ्छ भन्ने विषय चासोको केन्द्रमा रहनेछ।
- ADVERTISEMENT -
