संक्रमित बढेपछि पूर्वी चितवनका चार नगरपालिकामा निषेधाज्ञा

चितवन / कोरोना भाइरस (कोभिड–१९) संक्रमितको संख्या बढ्दै गएपछि पूर्वी चितवनका चार वटा नगरपालिकामा पनि आज रातिदेखि निषेधाज्ञा लागू गरिएको छ । पूर्वीचितवनका रत्ननगर, कालिका, खैरहनी र राप्तीका प्रमुखहरुको आज (आइतबार) बसेको बैठकले चार नगरपालिका क्षेत्रमा निषेधाज्ञा लागू गर्ने निर्णय गरेको रत्ननगर नगरपालिकाका प्रमुख नारायण वनले जानकारी दिए ।
उनले निषेधाज्ञा लागू गर्नका लागि नगरपालिकाले निर्णय गरेर प्रमुख जिल्ला अधिकारी नारायण प्रसाद भट्टराईलाई जानकारी गराएको बताए । उनले भने–‘जोखिम बढेकाले चार नगरपालिकामा निषेधाज्ञाका लागू गर्न जिल्ला प्रशासनलाई भनेका छौं ।’
नगर प्रमुख वनले आज राति १२ बजेदेखि लागू हुने गरी भदौं ७ गतेसम्मका लागि निषेधाज्ञा लागू गर्ने निर्णय भएको जानकारी दिए ।
बैठकले बकुलहर रत्ननगर अस्पतालमा आइसोलेशन तयार गर्ने र कोरोना परीक्षणको लागि प्रदेश सरकारसंग पिसीआर मेसिन माग गर्ने निर्णय भएको रत्ननगरकी उपमेयर विमला दुवाडीले जानकारी दिइन । बैठकमा रत्ननगरका मेयर वन सहित कालिकामा मेयर खुमनारायण श्रेष्ठ, खैरहनीका मेयर लालमणि चौधरी, राप्तीकी मेयर प्रभा बराल, रत्ननगरकी उपमेयर दुवाडी लगायतको सहभागिता रहेको थियो ।
चितवनका प्रमुख जिल्ला अधिकारी भट्टराईले आज राति देखिनै लागू हुने गरि पूर्वीचितवनमा निषेधाज्ञा घोषणा गरिएको भन्दै यस बारेमा आजै सार्वजनिक सूचना जारी गरिने बताए ।
पछिल्ला केहीदिन पूर्वीचितवनमा पनि कोरोना भाइरसका संक्रमित थपिदै गइरहेका छन् । शनिबार राति गरिएको परीक्षणमा रत्ननगर नगरपालिका–५ र १२ का ३ पुरुष र एक महिला गरी चार जनामा कोरोना संक्रमण पुष्टि भएको छ भने खैरहनी नगरपालिका–८ का २ जना पुरुषमा संक्रमण पुष्टि भएको छ ।