चितवन / भरतपुर वाइपास रोडमा स्थित महाबौद्ध गुम्बा तीन खोलेमा २५७०औं बुद्धजयन्ती मनाउने भएको छ । विगतका वर्षहरुमा जस्तै यसवर्ष पनि बुद्ध जयन्तीलाई भव्यताका साथ मनाउने तयारी भइरहेको बुधबार पत्रकार सम्मेलन मार्फत गुम्बा समितिका अध्यक्ष दलबहादुर गुरुङले जानकारी दिए ।
वैशाख १८ गते परेको बुद्ध जयन्तीका लागि गुम्बा परिसरमा सरसफाइ गरेर लुङ्दा तथा ध्वजापताकामार्फत सजिसजाउ गरिएको छ । त्रिसंयोग अर्थात् जन्मिएको दिन, सम्यक सम बुद्धत्व ज्ञान प्राप्त गरेको दिन र महापरिनिर्वाण भएको तिथिमा बुद्ध जयन्ती मनाउँदै आइएको छ । भगवान् गौतम बुद्धको ज्ञान, गुण र अमृतमय उपदेशलाई स्मरण गर्दै विभिन्न खालका कार्यक्रम सञ्चालन गरिने मनाइने अध्यक्ष गुरूङले बताए ।
- ADVERTISEMENT -
उनका अनुसार बुद्ध जयन्तीका दिन बिहान ६ देखि ७ बजेसम्म शुद्धीकरण पूजा, ७ देखि १० बजेसम्म शान्ति पदयात्रा हुनेछ । गुम्बा परिसरबाट निस्कने पदयात्राले विशालचोक, दीपेन्द्रचोक, वीरेन्द्र क्याम्पसचोक हुँदै शहीदचोकबाट मिलनरोड हुँदै लीलाचोक, रामेश्वर मन्दिर, तरकारी बजारदेखि बुद्ध टोल हुँदै पुनः गुम्बामा आइपुग्ने तालिका रहेको अध्यक्ष गुरूङले बताए ।
दिउँसो १ बजेपछि बौद्ध आचार्य लोपेन रिन्छेन दोर्जे ९सञ्जीव० गुरूङबाट धर्मदेशना हुनेछ । उक्त कार्यक्रममा सहभागी भई सहयोग गरिदिन पनि समितिले आग्रह गरेको छ । बुद्ध जयन्ती केवल पर्वमात्रै नभई धर्मरक्षाका लागि पनि मनाइने हुँदा बुद्धधर्मप्रति आस्था राख्ने सबैका लागि पुण्य प्राप्त गर्ने अवसरसमेत रहेको उनको भनाइ छ ।
