एकैदिन विश्वभर ६ लाख २० हजार बढी कोभिड–१९ पुष्टि, संक्रमित ५ करोड नजिक

0
123

काठमाण्डौं / विश्वभर पछिल्लो २४ घन्टामा ६ लाख २० हजार १ सय ३० जनामा कोरोना भाइरस (कोभिड–१९) संक्रमण पुष्टि भएको छ । यो संख्या कोरोना संक्रमण सुरु भएपछिको अहिलेसम्मकै धेरै हो । पछिल्लो २४ घन्टामा ९ हजार ५३ जनाले ज्यान गुमाएका छन् । यो संख्या पनि पछिल्लो १ महिनाको धेरै हो ।
पछिल्लो २४ घन्टामा सबैभन्दा धेरै अमेरिकामा १ लाख २९ हजार ७ सय ८८ जनामा कोरोना संक्रमण भएको छ । फ्रान्समा ६० हजार ४ सय ८६, भारतमा ४९ हजार ८ सय ५१, इटलीमा ३७ हजार ८ सय ९, बेलायतमा २३ हजार २ सय ८७, जर्मनीमा २२ हजार २ सय ४६, स्पेनमा २२ हजार ५ सय १६, रसियामा २० हजार ५ सय ८२ र रसियामा १८ हजार २ सय ४७ जनामा कोरोना संक्रमण भएको छ ।
पछिल्लो २४ घन्टामा अमेरिकामा १ हजार २ सय २१ जनाले ज्यान गुमाएका छन् । त्यस्तै भारतमा ५ सय ७६, फ्रान्समा ८ सय २८, इटलीमा ४ सय ४६, रसियामा ३ सय ७८, अर्जेन्टिनामा ३ सय ७०, बेलायतमा ३ सय ५५, मेक्सिकोमा ५ सय ४४, इरानमा ४ सय २४ र पोल्याण्डमा ४ सय ४५ जनाको कोरोना संक्रमणबाट पछिल्लो २४ घन्टामा ज्यान गएको छ ।
संसारभर संक्रमितको संख्या झण्डै ५ करोड पुगेको छ । यो समाचार तयार पार्दासम्म ४ करोड ९६ लाख ४६ हजार १ सय १४ जनामा कोरोना संक्रमण भएको छ । ज्यान गुमाउनेको संख्या पनि बढेर १२ लाख ४७ हजार ९ सय ७२ पुगेको छ । संक्रमितमध्ये ३ करोड ५२ लाख ४४ हजार ६ सय ३७ जना कोरोना मुक्त भएका छन् भने ९० हजार ८ सय ६ जनाको अवस्था गम्भीर छ । १ करोड ३१ लाख ५३ हजार ५ सय ५ जना सक्रिय संक्रमित छन् ।